1 मिनेट 
काठमाडौँ, २३ असोज
भीम सार्कीको ६३ रन तथा कमलसिंह ऐरीको चार विकेटप्रेरित चितवन पोखरा राइनोजलाई चार विकेटले हराउँदै एभरेस्ट प्रिमियर लिग ईपीएल ट्वान्टी–२० क्रिकेटको उपाधि जितेको छ । आज कीर्तिपुरस्थित त्रिवि क्रिकेट मैदानमा टस हारेर ब्याटिङका लागि निम्त्याइएको पोखराले १७।५ ओभरमा सबै विकेट गुमाएर १११ रन बनाएको थियो । ११२ रनको लक्ष्य चितवनले १५।५ ओभरमा ६ विकेट गुमाएर पूरा र्गयो । योसँगै चितवन पहिलोपटक उपाधि जित्न सफल भयो । पोखराले पनि पहिलोपटक ईपीएलको फाइनल खेलेको हो । यसअघि, ललितपुर प्याट्रियट्स, विराटनगर वारियर्स र पञ्चकन्या तेजले उपाधि जितेका थिए । चितवन र पोखरा यसअघि पनि दुईपटक आमने–सामने भएका थिए । दुवै खेलमा पोखराले कमजोर ब्याटिङ प्रदर्शन गरेको थियो । यसअघि, पनि दुवै खेलमा पहिले ब्याटिङ गरेको पोखराले लिग चरणको खेलमा १२३ र पहिलो क्वालिफायर्समा ६६ रन मात्र बनाउन सकेको थियो । आज पनि कमजोर ब्याटिङ प्रदर्शन गर्दा पोखराको पहिलोपटक उपाधि जित्ने सपना पूरा हुन सकेन ।
