चितवनमा दसैँ—तिहारमा जुवातास खेल्ने १८ जना पक्राउ, करिब ३ लाख बरामद

काठमाडौं,२३ कात्तिक ।
चितवनमा दसैँ—तिहारमा जुवातास खेल्ने १८ जना पक्राउ परेका छन् । चितवनका प्रहरी प्रवक्ता सूर्यबहादुर थापाका अनुसार उनीहरूको साथबाट २ लाख ९१ हजार ६ सय ५ रूपैयाँ बरामद गरिएको छ ।
भाइटीकाको दिन राप्ती नगरपालिकाको पाख्रिबासबाट १ लाख २३ हजार २ सय रूपैयाँसहित ३ जना पक्राउ गरिएको छ । यस्तै कात्तिक १५ गते भरतपुर महानगर—४ यज्ञपुरीको टेम्पल कटेजबाट १६ हजार १५ रुपैयाँसहित तास खेलेका २ जनालाई पक्राउ गरिएको छ ।
१६ गते भरतपुर—१६ चोकबजारबाट ५३ हजार ७० रूपैयाँसहित जुवा खेलिरहेका ८ जनालाई पक्राउ गरी कारबाही गरिएको छ । असोज २८ गते खैरहनी नगरपालिका—८ मगनीबाट ९९ हजार ३ सय २० रूपैयाँसहित लुडो खेलिरहेका ५ जना पक्राउ परेका छन् ।