न्यायाधीशहरूद्वारा बन्दी प्रत्यक्षीकरण बाहेकका इजलास बहिस्कार

काठमाडौं,२३ कात्तिक ।
प्रधानन्यायाधीश चोलेन्द्र शमशेर जबराको राजीनामा माग गर्दै अदालतमा भद्र अवज्ञा गर्दै आएका सर्वोच्च अदालतका न्यायाधीशहरूले आज पनि इजलास बहिस्कार गरेका छन् । एउटा इजलासमा बन्दी प्रत्यक्षीकरणको रिट हेरे पनि अन्य न्यायाधीशहरूले इजलासमा बस्न इन्कार गरेका हुन् ।
हिजोको छलफलमा न्यायाधीशहरूले बन्दी प्रत्यक्षीकरणका रिट हेर्ने र प्रधानन्यायाधीशसँग इजलास शेयर नगर्ने निर्णय गरेका थिए । प्रधानन्यायाधीशले आज आफू सहितका १० इजलास गठन गरेका थिए । यसअघि बन्दी प्रत्यक्षीकरणका मुद्दा मात्र पेशीमा चढाउने गरिएकोमा आजदेखि सबैखाले मुद्दाको पेशी तोकिएको थियो ।
न्यायाधीश तेजबहादुर केसी र मनोज शर्माको इजलास बसेर बन्दी प्रत्यक्षीकरणको रिट हेरे पनि सो इजलासमा तोकिएका अन्य मुद्दामा सुनुवाइ भएन । सर्वोच्च अदालतको पेशी सूचीमा अन्य मुद्दा हेर्न नभ्याइनेमा राखिएको छ ।
प्रधानन्यायाधीश जबराले भने एकल इजलासमा बसेर मुद्दाको सुनुवाइ गरेका छन् । मन्त्रिपरिषद्मा भागबण्डा खोजेको, न्यायालयको गरिमा घटाउने गरी सेटिङ गरेको जस्ता आरोप लगाउँदै न्यायाधीशहरूले जबराको राजीनामा माग गरेका छन् ।