1 मिनेट 
काठमाडौं,५ पुष ।
नेकपा माओवादी केन्द्रको प्रदेश अधिवेशनमा प्रदेश नम्बर १ र बागमती प्रदेशमा सर्वसम्मत नेतृत्व चयन हुन सकेको छैन । पार्टी अध्यक्ष पुष्पकमल दाहाल प्रचण्डले सबै प्रदेशमा सहमतिकै माध्यमबाट नेतृत्व र पदाधिकारी चयन गर्न निर्देशन भएको तापनि यी दुईवटा प्रदेशमा भने कसैको नाममा पनि सहमति जुट्न सकेन ।
सर्वसम्म हुन नसकेपछि अब यी दुईवटा प्रदेशमा चुनावमार्फत नेतृत्व चयन हुने भएको छ । यसमा अध्यक्ष प्रचण्डले पनि चुनावमार्फत भए पनि नेतृत्व चयन गर्न निर्देशन दिएको स्रोतको भनाइ छ ।
गत मंसिर २५ र २६ गते विराटनगरमा प्रदेश १ को अधिवेशन भएको थियो । प्रदेश अध्यक्षसहित पदाधिकारीमा धेरै आकांक्षी देखिएपछि पदाधिकारीको टुंगो लाग्न सकेको छैन । अधिवेशनले २७१ सदस्यीय कार्यसमिति चयन गरे तापनि पदाधिकारी भने सहमतिमार्फत चयन हुन नसकेको हो । प्रदेश अध्यक्षमा ६ जनाको दाबी परेको छ, तर सर्वसम्मत हुन नसकेपछि अब चुनावमा गएर टुंगो लगाइने भएको छ ।
यस्तै बाग्मती प्रदेशमा मंसिर २५ मा सम्मपन्न अधिवेशनले २७१ सदस्यीय कार्यसमिति चयन गरेको छ । तर प्रदेश अध्यक्ष र पदाधिकारीहरुको भने टुंगो लाग्न सकेको छैन । यसमा पनि सर्वसम्मतिका प्रयासहरु असफल भएपछि अब चुनावमार्फत नै नेतृत्व र पदाधिकारी चयन हुने भएको छ ।
बागमती प्रदेश नेतृत्व चयन गर्न आजै चुनावी प्रक्रिया सुरू हुँदैछ । स्रोतका अनुसार बिहान ११ बजे काठमाडौमा रहेको अनुपम फुडल्यान्डमा बाग्मती प्रदेश नेतृत्व चयनका लागि चुनावी प्रक्रिया सुरु हुन लागेको हो । बाग्मतीमा अध्यक्षका लागि देवीप्रसाद ढकाल (डीपी), दिनानाथ गौतम, विशाल खड्कालगायत आंकाक्षीले नाम अघि सारेका छन् ।
