कोभिड महामारीले महिलालाई बढी असर गरेको छ : महिला मन्त्री रेग्मी

काठमाडौं, २४ फागुन ।
महिला, बालबालिका तथा ज्येष्ठ नागरिक मन्त्री उमा रेग्मीले महिलाको सारभूत समानता सहितको लैङ्गिक समानतामूलक राष्ट्र निर्माणको यात्रामा अघि बढ्नुपर्ने बताउनुभएको छ । ११२ औं अन्तर्राष्ट्रिय महिला दिवसको सन्दर्भमा शुभकामना वक्तव्य जारी गर्दै मन्त्री रेग्मीले विगतभन्दा राजनीतिक, आर्थिक एवम् सामाजिक क्षेत्रमा महिलाको प्रतिनिधित्व वृद्धि भएपनि समग्ररुपमा अझैपनि लैङ्गिक समानतामुलक राष्ट्र बनिनसकेको बताउनुभएको छ । ‘महिलाहरूको प्रतिनिधित्व राजनैतिक, आर्थिक एवम् सामाजिक क्षेत्रमा क्रमशः वृद्धि भएको छ, मातृ मृत्युदरमा उल्लेखनीय सुधार, महिलाको कूल साक्षरता दरमा वृद्धि तथा आर्थिक सशक्तीकरणका सूचकहरूमा सकारात्मक परिवर्तन भइरहेको मन्त्री रेग्मीले बताउनुभएको छ । उहाँले महिलाहरूको जीवन सुरक्षा र सम्मानका लागि आर्थिक उपार्जनमूलक कार्यमा लगाउन आवश्यक रहेको बताउनुभएको छ ।