1 मिनेट 
भक्तपुर, १ चैत : स्थानीय निर्वाचनकोबारेमा केन्द्रित रहेर नेकपा एमालेका अध्यक्ष केपी शर्मा ओलीको निवास बालकोटमा आज बसेको एमाले सचिवालय बैठक सम्पन्न भएको छ ।
बैठकले स्थानीय तहको निर्वाचनमा उम्मेदवार सिफारिसका लागि मापदण्ड पारित गरेको प्रचार विभाग प्रमुख पृथ्वीसुब्बा गुरुङले बैठक पछि जानकारी दिनु भयो । आउँदो बैशाख ३० गते हुने स्थानीय तहको निर्वाचनका लागि एमालेले वडाध्यक्ष र सदस्यहरुको उम्मेदवारको सिफारिस वडा कमिटीबाट गर्ने र जिल्ला कमिटीले टिकट टिकटको निर्णय गर्ने विधि तय गरेको छ ।
त्यस्तै गाउँपालिका अध्यक्ष र उपाध्यक्ष एवं नगरपालिकाका प्रमुख र उपप्रमुखको सिफारिस जिल्ला कमिटीले गर्ने तथा निर्णय प्रदेश कमिटीले गर्ने गरि मापदण्ड तय गरेको उहाँले जानकारी दिनु भयो ।
बैठकले महानगरपालिका र उपमहानगरपालिकाका प्रमुख तथा उपप्रमुखको टिकटका लागि जिल्ला र प्रदेश कमिटीले सिफारिस गर्ने र टिकटको निर्णय पार्टी केन्द्रले गर्ने आजको बैठकले निर्णय गरेको उहाँले जानकारी दिनु भयो ।
केन्द्रीय कमिटी बैठकले राजनीतिक प्रतिवेदनसहित दिशा निर्देशन गर्ने भएको छ । आगामी चुनावी रणनीति बनाउन एमाले चैत ७ गते पोलिटव्यूरो तथा चैत ९ र १० गते केन्द्रीय कमिटी बैठक बोलाएको छ । त्यस्तै चैत १३ गते स्थायी कमिटी बैठक बस्ने गुरुङले जानकारी दिनु भयो । बैठकलृ निर्वाचनका लागि घोषणा पत्र निर्माण गर्ने निर्णय गरेको छ ।
