भक्तपुर, १० माघ : नेपाल भाषाका साहित्यकार, नेपाल भाषासेवी युद्धप्रसाद मिश्र स्मृति प्रतिष्ठानका संस्थापक संयोजक एवं सल्लाहकार त्रिरत्न शाक्यको निधन भएको छ ।
नेपाली प्रगतिवादी साहित्य, नेपाल भाषा साहित्य, बौद्ध दर्शन, कम्युनिस्ट विचारधारा, प्रजातान्त्रिक आन्दोलनका योद्धा, शैक्षिक उन्नयन र समाजसेवाका क्षेत्रमा योगदान दिनु भएका शाक्यको राती भक्तपुरस्थित उहाँकै निवासमा निधन भएको हो । आज दिनभर उहाँको शव निवासमा श्रद्धाञ्जलीका लागि राखिएको छ ।
युद्धप्रसाद मिश्र स्मृति प्रतिष्ठानका महासचिव नन्दु उप्रेतीले उहाँको निधनले भाषा, साहित्य एवं बौद्ध दर्शनको क्षेत्रले एउटा सशक्त अभियन्ता गुमाएको बताउनुभयो ।
साहित्यकार शाक्यको भोली शुक्रबार सवा १२ बजे शवयात्रा गरिने भएको छ । बिराट गुठीका अनुसार शाक्यको सूर्यविनायकस्थित निवासबाट सुरु हुने शवयात्रा राम मन्दिर, नासमना, बौद्ध समंकृत विहार मिनिबस पार्क, लायकू, भोलाछेँ, थालाछेँलगायत नगर परिक्रमा गरि दाहसंसकार गरिने जनाएको छ ।