२५ श्रावण काठमाडौं । साविक उपविजेता लिभरपुलले इङ्लिस प्रिमियर लिग फुटबलमा सुखद सुरुवात गरेको छ । नयाँ सिजनको पहिलो खेलमा लिभरपुलले नवप्रवेशी क्लब नर्विच सिटीलाई ४–१ गोलले हराएको थियो ।
लिभरपुलको घरेलु मैदान एनफिल्डमा शुक्रबार राति भएको खेलमा लिभरपुललाई जिताउन मोहमद सलाह, भर्जिल भान डाइक र डिभोक ओरिगीले गोल गरे ।
नर्विचका टिमु पुक्कीले सान्त्वना गोल फर्काए । लिभरपुलले सातौ मिनेटमा नर्विचका ग्रान्ट हान्लेको आत्मघाती गोलबाट अग्रता लिएको थियो ।
त्यसपछि १९औं मिनेटमा मोहमद सलाहले गोल गर्दै लिभरपुलको अग्रता दोब्बर बनाए । यस्तै २८औं मिनेटमा सलाहको पासमा भर्जिल भान डाइकले गोल गरेपछि लिभरपुल सहज जिततर्फ उन्मुख देखिएको थियो ।
४२औं मिनेटमा डिभोक ओरिगीले ट्रेन्ट एलेक्सन्डर अर्नाेल्डको पासमा गोल गर्दै लिभरपुललाई पहिलो हाफमै ४–० को अग्रता दिलाएका हुन् । ६४औं मिनेटमा नर्विचका टिमु पुक्कीले गोलगर्दै लिभरपुलको अग्रता घटाउने प्रयास गरे । त्यसपछि थप गोल भएन र लिभरपुल सजिलै विजयी भएको थियो ।