1 मिनेट 
१५ असोज २०७६
काठमाडौं । सिंगापुरमा चलिरहेको त्रिकोणात्मक टि–ट्वान्टी क्रिकेटमा नेपाली राष्ट्रिय क्रिकेट टोली आज अन्तिममा खेलमा घरेलु टोलीसँग खेल्दैछ । दोस्रो जितको लक्ष्यसहित नेपाली टोली सिंगापुरविरुद्ध खेल्न लागेको हो । सिंगापुरस्थित इन्डियन एसोसिएसनको मैदानमा खेल आज बेलुका सवा ५ बजे सुरु हुनेछ ।
लगातार दुई पटक टेष्ट राष्ट्र जिम्बाब्वेलाई हराउने अवसरबाट वञ्चित नेपाल आज सिंगापुरमाथिको जितको लय कायम राख्ने योजनामा छ । नेपालले यसअघि सिंगापुरमाथि ९ विकेटको जित निकालेको थियो ।
जिम्बाब्वेसँग भने नेपालले सम्झनलायक प्रदर्शन गर्न सकेन । पहिलो खेलमा ५ विकेटले पराजित नेपाल हिजो भएको अर्को खेलमा ४० रनले पराजित भएको थियो ।
युवा खेलाडीको परीक्षाको रुपमा रहेको यस प्रतियोगितामा डेब्यु गरेका खेलाडीले गतिलो प्रदर्शन गर्न सकेका छैनन् । कप्तान पारस खड्काले यसअघि इशान पाण्डे र कुशल मल्ललाई खेलाइसकेका छन् ।
पवन सराफ पाण्डेलाई स्थानान्तरण गर्दै हिजो टोलीमा समावेश भएका थिए । तर ओपनिङमा आएका सराफले पनि केही गर्न सकेनन् । त्यहि भएर कप्तान पारसले आज टोलीमा फेरबदल गर्ने सम्भावना छ ।
सिरिजको फाइनलमा शीर्ष दुई टोली खेल्ने भएका कारण नेपाल आज जित्नैपर्ने दबाबमा छ । जिम्बाब्वे ३ मध्ये २ खेलमा जितसहित ४ अंकका साथ शीर्षस्थानमा छ । समान अंक भए पनि रनरेटका आधारमा नेपाल दोस्रो स्थानमा रहँदा सिंगापुर पुछारमा छ ।
सिंगापुरको टि–ट्वान्टी सिरिजपछि नेपाली क्रिकेट टोली ओमानमा हुने पाँच राष्ट्र सहभागि टि–ट्वान्टी सिरिज खेल्न जानेछ ।
