२० भाद्र २०७६ । कोरियाली स्मार्टफोन निर्माता कम्पनी सामसुङ इलेक्ट्रोनिक्सको पट्याउन मिल्ने फोन आजदेखि विक्रीका लागि उपलब्ध हुने भएको छ । कम्पनीले घरेलु बजारका साथै अमेरिका, बेलायत र सिंगापुरलगायतका देशमा ग्यालेक्सी फोल्ड उपलब्ध गराउन लागेको हो ।
कम्पनीले करीब २ हजार डलर पर्ने सो फोन जुलाईमा नै लञ्च गरेको थियो । तर स्क्रिन फुट्ने समस्या देखिएपछि कम्पनीले फोनको विक्री पछाडि सारेको थियो । सामसुङले जुलाईमा नै फोनमा देखिएको समस्या सुधारेको र सेप्टेम्बरमा विक्री शुरु गर्ने बताएको थियो ।
पछिल्लो समय स्मार्टफोन बजार सुस्ताउन थालेको छ । अमेरिका–चीनबीचको व्यापार युद्धले पनि उद्योग स्मार्टफोन मारमा परेको छ । सामसुङले चिनियाँ दूरसञ्चार उपकरण निर्माता कम्पनीहरु हुवावेई, साओमी लगायत अन्य कम्पनीबाट तीव्र प्रतिस्पर्धाको सामना गरिरहेको छ ।
यो वर्षको शुरुमा साओमीले ट्याबलेटको रुपमा समेत चलाउन सकिने पट्याउन मिल्ने फोनको नमूना सार्वजनिक गरेको थियो । एजेन्सी